சென்னை: கலைஞர் கருணாநிதி பிறந்தநாள் விழாவில் பேசிய சென்னை மாநகராட்சி மேயர் பிரியா, பொய்யான வாக்குறுதிகளை அளிப்பவர்களுக்கு மக்கள் சரியான பதிலடி கொடுப்பார்கள் என்றும், திமுக எப்போதும் மக்களோடு இருக்கும் இயக்கம் என்றும் தெரிவித்தார்.
முன்னாள் முதலமைச்சரும், திமுக முன்னாள் தலைவருமான கலைஞர் மு.கருணாநிதியின் பிறந்தநாள் விழா சென்னை ராஜா அண்ணாமலை மன்றத்தில் நடைபெற்றது.
இந்த விழாவில் தூய்மைப் பணியாளர்கள் உள்ளிட்ட பொதுமக்களுக்கு நலத்திட்ட உதவிகள் வழங்கப்பட்டன. நிகழ்ச்சியில் முன்னாள் அமைச்சர்கள் சேகர் பாபு, கே.என்.நேரு மற்றும் சென்னை மாநகராட்சி மேயர் பிரியா உள்ளிட்டோர் கலந்து கொண்டனர்.
விழாவில் பேசிய மேயர் பிரியா, “பொய்யான வாக்குறுதிகளை வழங்கி மக்களை கவர முயற்சிக்கும் சில அரசியல் சக்திகள் உள்ளன. ஆனால் மக்களுக்கான களப்பணியில் ஈடுபடுவது திமுக மட்டுமே” என்றார்.
கொரோனா பேரிடர் காலத்தில் முதலமைச்சர் மு.க.ஸ்டாலின் நேரடியாக மருத்துவமனைகளுக்குச் சென்று மக்களுக்காக பணியாற்றியதை அவர் நினைவுகூர்ந்தார். தொடர்ந்து பேசிய அமைச்சர் கே.என்.நேரு, தூய்மைப் பணியாளர்களை தொழிலதிபர்களாக மாற்றுவதே அரசின் நோக்கம் என்று தெரிவித்தார்.
மெட்ரோ வாட்டர் துறையில் பணிபுரிந்து உயிரிழந்த தொழிலாளர்களின் குடும்பங்களுக்கு ரூ.700 கோடி மானியத்தில் கழிவுநீர் அகற்றும் வாகனங்கள் வழங்கப்பட்டுள்ளதாகவும் அவர் கூறினார்.
மேலும், வரவிருக்கும் உள்ளாட்சித் தேர்தலில் திமுக மீண்டும் வெற்றி பெற்று மக்கள் பணியைத் தொடரும் என்று நம்பிக்கை தெரிவித்தார்.
