சென்னை: ESI திட்டத்தில் பதிவு செய்யப்பட்ட தொழிலாளர்களின் பிள்ளைகளுக்கான 2026-27 கல்வியாண்டு மருத்துவப் படிப்பு சேர்க்கைக்கான விண்ணப்பங்களை ESIC அறிவித்துள்ளது. மொத்தம் 783 இடங்கள் ஒதுக்கப்பட்டுள்ள நிலையில், ஜூன் 21 கடைசி நாளாக நிர்ணயிக்கப்பட்டுள்ளது.
தொழிலாளர் மற்றும் வேலைவாய்ப்பு அமைச்சகத்தின் கீழ் செயல்படும் ஊழியர்களின் மாநில காப்பீட்டுக் கழகம் (ESIC), காப்பீடு செய்யப்பட்ட நபர்களின் வாரிசுகளுக்கான (IP Quota) 2026-27 கல்வியாண்டு மருத்துவ சேர்க்கை அறிவிப்பை வெளியிட்டுள்ளது.
ESI திட்டத்தில் பதிவு செய்யப்பட்ட தொழிலாளர்களின் பிள்ளைகளுக்காக இந்த சிறப்பு இடஒதுக்கீடு வழங்கப்படுகிறது. இந்த கல்வியாண்டில் மொத்தம் 783 இடங்கள் ஒதுக்கப்பட்டுள்ளன. இதில் 695 MBBS இடங்கள், 28 BDS இடங்கள் மற்றும் 60 B.Sc Nursing இடங்கள் அடங்கும். இந்த திட்டத்தின் கீழ் சேரும் மாணவர்கள் MBBS மற்றும் BDS படிப்புகளுக்கு ஆண்டுக்கு ரூ.24,000 கல்விக் கட்டணமும், B.Sc Nursing படிப்பிற்கு ஆண்டுக்கு ரூ.10,000 கல்விக் கட்டணமும் செலுத்த வேண்டும்.
தகுதி பெறுவதற்கு, பெற்றோர் ESI சட்டத்தின் கீழ் பதிவு செய்யப்பட்ட காப்பீடு பெற்ற நபராக இருக்க வேண்டும். மேலும், 2025 செப்டம்பர் 30-ஆம் தேதி நிலவரப்படி ESI திட்டத்தில் பங்களிப்பாளராக இருந்திருக்க வேண்டும். ஆண் விண்ணப்பதாரர்கள் 2026 மார்ச் 8-ஆம் தேதி நிலவரப்படி 21 வயதுக்கு மேற்பட்டவர்களாக இருக்கக்கூடாது. திருமணமாகாத பெண் வாரிசுகளுக்கு இந்த வயது வரம்பு பொருந்தாது.
விண்ணப்பதாரர்கள் ESIC வழங்கிய செல்லுபடியாகும் IP சான்றிதழ், NEET (UG) 2026 தேர்வு அனுமதி அட்டை, வயது சான்றிதழ், புகைப்படம் உள்ளிட்ட ஆவணங்களை பதிவேற்றம் செய்ய வேண்டும். காப்பீடு செய்யப்பட்ட நபரின் வாரிசு (IP) சான்றிதழை சமர்ப்பிப்பதற்கான கடைசி நாள் ஜூன் 21, 2026 என அறிவிக்கப்பட்டுள்ளது.
