புதுடெல்லி: சர்வதேச சதுரங்க தரவரிசையில் மீண்டும் முதல் 10 இடங்களுக்குள் வந்த பிரக்ஞானந்தா, ஒரு மாதத்தில் 17 புள்ளிகள் அதிகரித்து 14வது இடத்திலிருந்து 8வது இடத்திற்கு முன்னேறியுள்ளார்.
சர்வதேச சதுரங்க கூட்டமைப்பு வெளியிட்டுள்ள தரவரிசையில், நார்வேயின் கார்ல்சன் (2833 புள்ளிகள்) முதலிடத்தில் உள்ளார். இந்தியாவின் நடப்பு உலக சாம்பியனான குகேஷ் (2787) கூடுதலாக 10 புள்ளிகள் பெற்று, இரண்டு இடங்கள் முன்னேறி 3வது இடத்தைப் பிடித்துள்ளார்.
ஃபேபியானோ கருணா (அமெரிக்கா, 2783) 4வது இடத்திற்கு முன்னேறியுள்ளார். சமீபத்திய போட்டிகளில் ஏமாற்றமளித்த இந்தியாவின் அர்ஜுன் எரிகைசி (2777) 24 புள்ளிகள் இழந்து 5வது இடத்தில் உள்ளார். பிரக்ஞானந்தா (2758) 17 புள்ளிகள் அதிகரித்து, ஆறு இடங்கள் முன்னேறி 8வது இடத்தைப் பிடித்துள்ளார்.
மற்ற இந்திய வீரர்கள் ஆனந்த் (14, 2743), அரவிந்த் சிதம்பரம் (22, 2732), விதித் குஜராத்தி (24, 2720) ஆகியோர் ‘டாப்-25’ பட்டியலில் உள்ளனர். பெண்கள் பிரிவில், இந்தியாவின் ஹம்பி (2528, 6வது) ‘டாப்-10’ பட்டியலில் உள்ளனர். வைஷாலி (2484, 14) மற்றும் ஹரிகா (2483, 16) ஆகியோர் அடுத்த இடங்களில் உள்ளனர்.
