பெங்களூரு: ஐக்கிய அரபு அமீரகத்தின் ஷார்ஜாவில் 14 ஆண்டுகளாக பணியாற்றி வந்த கர்நாடகாவைச் சேர்ந்த ஆல்ஃபின் பிரகாஷ் கொடூரமாக கொலை செய்யப்பட்ட சம்பவம் அதிர்ச்சியை ஏற்படுத்தியுள்ளது. காரில் 9 துண்டுகளாக அவரது உடல் கண்டெடுக்கப்பட்ட நிலையில், மனைவி மற்றும் மகனும் காணாமல் போயிருப்பது வழக்கில் மர்மத்தை அதிகரித்துள்ளது.
உடுப்பி மாவட்டம் குந்தாபுராவைச் சேர்ந்த ஆல்ஃபின் பிரகாஷ் குந்தர், ஷார்ஜா விமான நிலையத்தில் சுமார் 14 ஆண்டுகளாக பணியாற்றி வந்தார். அவரது மனைவி டினா அங்குள்ள பள்ளியில் ஆசிரியையாகவும், மகன் 10-ம் வகுப்பு மாணவராகவும் இருந்தனர்.
கடந்த ஜூலை 20-ம் தேதி ஆல்ஃபினின் சகோதரர் அனில் அவரை தொலைபேசியில் தொடர்புகொண்டார். அழைப்பை ஏற்காத ஆல்ஃபின், தான் நலமாக இருப்பதாக குறுஞ்செய்தி அனுப்பியதாக கூறப்படுகிறது.
பின்னர் அவரையும் மனைவியையும் தொடர்புகொள்ள முடியாததால் அனில் சந்தேகமடைந்தார். ஷார்ஜாவில் இருந்த நண்பர் மூலம் வீட்டில் விசாரித்தபோது, குடும்பத்தினர் இந்தியாவுக்கு சென்றுவிட்டதாக காவலாளி தெரிவித்தார்.
ஆனால், விமானப் பயணப் பதிவுகளை சோதித்தபோது ஆல்ஃபின், அவரது மனைவி மற்றும் மகன் இந்தியா வரவில்லை என்பது தெரியவந்தது.
காருக்குள் கொடூரமாக…
இதையடுத்து போலீசார் ஆல்ஃபினின் செல்போன் நடவடிக்கைகளை ஆய்வு செய்தனர். அவர் கடைசியாக ஓமன் செல்லும் சாலையை நோக்கிச் சென்றது தெரியவந்தது.
அந்த பகுதியில் நடத்தப்பட்ட தேடுதலில் சாலையோரம் நிறுத்தப்பட்டிருந்த காருக்குள் இரண்டு பைகளில் ஆல்ஃபினின் உடல் 9 துண்டுகளாக இருந்தது கண்டுபிடிக்கப்பட்டது. அவரது உடல் ஆகஸ்ட் 12-ம் தேதி மீட்கப்பட்டதாக தகவல்கள் தெரிவிக்கின்றன.
மேலும், அடுக்குமாடி குடியிருப்பு சி.சி.டி.வி. காட்சிகளில் 2 ஆண்கள் மற்றும் ஒரு பெண் அவசரமாக காரில் இருந்து வெளியேறும் காட்சிகள் பதிவாகியுள்ளதாக கூறப்படுகிறது.
இதனிடையே ஆல்ஃபினின் மனைவி மற்றும் மகன் எங்கு உள்ளனர் என்பது தெரியவில்லை. இருவரையும் போலீசார் தீவிரமாக தேடி வருகின்றனர். கொலைக்கான காரணம் மற்றும் சம்பவத்தில் தொடர்புடையவர்கள் குறித்து ஐக்கிய அரபு அமீரக போலீசார் விசாரணை நடத்தி வருகின்றனர்.
