மோகன்லால், மஞ்சு வாரியர், பிரகாஷ் ராஜ் நடித்த ‘ஓடியன்’ படத்தை இயக்கியவர் ஸ்ரீகுமார் மேனன். பல கமர்ஷியல் படங்களையும் இயக்கியுள்ளார். நடிகை மஞ்சு வாரியர் அவர் மீது 2019-ம் ஆண்டு போலீசில் புகார் அளித்தார். திருவனந்தபுரம் டிஜிபியிடம் நேரில் அளித்த புகாரில், ஸ்ரீகுமார் மேனன் சமூக வலைதளங்களில் தன்னையும் நண்பர்களையும் தொடர்ந்து அவமதிப்பதாகவும், உயிருக்கு பயப்படுவதாகவும் கூறியிருந்தார்.
அதற்கு பதிலளித்த ஸ்ரீகுமார் மேனன், “நான் உங்களுக்கு என்ன துரோகம் செய்தேன் என்று எனக்குத் தெரியவில்லை. உங்களால் பல அவமானங்களைச் சந்தித்துள்ளேன். உங்கள் புகாரை சட்டப்பூர்வமாக எதிர்கொள்வேன்” என்றார். இது தொடர்பான வழக்கு திருச்சூர் முதலாவது மாஜிஸ்திரேட் கோர்ட்டில் நடந்து வந்தது. வழக்கு விசாரணைக்கு மஞ்சு வாரியர் ஆஜராகவில்லை. ஆனால், அவர் கூறிய குற்றச்சாட்டுகளுக்கு போதிய ஆதாரம் இல்லை என்று கூறி வழக்கை நீதிமன்றம் தள்ளுபடி செய்தது.
