பூந்தமல்லி : சென்னையில் புறநகர் மின்சார ரயில்கள், மெட்ரோ ரயில்கள் இயக்கப்பட்டாலும், அனைத்து இடங்களுக்கும் மாநகரப் பேருந்துகள் இயக்கப்படுவதால் மக்கள் பேருந்து போக்குவரத்தையே அதிகளவில் நாடியுள்ளனர். சென்னை மாநகர போக்குவரத்துக் கழகம் சார்பில் 659 வழித்தடங்களில் தினமும் 3,436 பேருந்துகள் இயக்கப்படுகின்றன. 32 பணிமனைகளில் இருந்து இயக்கப்படும் பேருந்துகளில் தினமும் 33.60 லட்சம் பேர் பயணம் செய்கின்றனர்.
இந்நிலையில், மாநகரப் பேருந்துகளில் நெரிசல் மற்றும் காலதாமதத்தைத் தடுக்கவும், பேருந்து பயணத்தை மேம்படுத்தவும் சிக்னல்களில் மாநகரப் பேருந்துகளுக்கு முன்னுரிமை அளிக்கும் புதிய திட்டத்தை மாநகரப் போக்குவரத்துக் கழகம் செயல்படுத்த உள்ளது. இதற்காக ஆலந்தூரில் இருந்து விமான நிலையம் வரையிலான ஜிஎஸ்டி சாலையில் முதற்கட்டமாக சோதனை ஓட்டம் நடத்தப்படுகிறது.
சென்னை மாநகர போக்குவரத்து கழக அதிகாரிகள் கூறியதாவது: சென்னையில் பள்ளி, கல்லூரி மாணவ, மாணவியர், வேலைக்கு செல்பவர்கள், மருத்துவமனை செல்வோர் என ஏராளமானோர் மாநகர பஸ்சை பயன்படுத்தி வருகின்றனர். இந்நிலையில், பல முக்கிய வழித்தடங்களில் பீக் ஹவர்ஸ் நேரங்களில் போக்குவரத்து நெரிசல் ஏற்படுவதால், மாநகர பஸ்களில் செல்லும் பயணிகள் உரிய நேரத்தில் செல்ல முடியாமல் அவதிப்படுகின்றனர். எனவே, சிக்னல்களில் மாநகர பஸ்களுக்கு முன்னுரிமை அளிக்க திட்டமிடப்பட்டுள்ளது.
அதன்படி, மாநகர பஸ்களை அடையாளம் காணவும், சிவப்பு சிக்னல் காலத்தை குறைக்கவும், கிரீன் சிக்னல் காலத்தை நீட்டிக்கவும் முடிவு செய்யப்பட்டுள்ளது. இதனால், மாநகர பஸ்கள் அதிக நேரம் சிக்னல்களில் நிற்காமல் கடந்து செல்கின்றன. ஐஐடி மெட்ராஸ் மற்றும் திருவனந்தபுரத்தில் உள்ள மேம்பட்ட கணினி மேம்பாட்டு மையம் ஆகியவை இணைந்து மாநகர பேருந்துகளின் செயல்திறனை மேம்படுத்தும் நோக்கத்துடன் இந்தத் திட்டத்தை முன்மொழிந்துள்ளன.
இதற்காக, மாநகர போக்குவரத்துக் கழகம், சென்னை ஒருங்கிணைந்த போக்குவரத்துக் குழுமம், சென்னை போக்குவரத்துக் காவல் துறை ஆகியவற்றின் பிரதிநிதிகள் அடங்கிய திட்ட ஆய்வுக் குழு அமைக்கப்பட்டுள்ளது. தமிழக அரசு, போக்குவரத்து துறை மற்றும் ஐஐடி மெட்ராஸ் ஆகியவை இணைந்து ரூ.82 லட்சம் செலவில் இத்திட்டத்தை செயல்படுத்துகின்றன. இந்நிலையில், முதற்கட்டமாக மாநகரின் போக்குவரத்து மிகுந்த முக்கிய சாலையான ஆலந்தூரில் இருந்து விமான நிலையம் வரையிலான ஜிஎஸ்டி சாலையில் இதற்கான சோதனை ஓட்டம் நடத்த மாநகர போக்குவரத்துக் கழகம் திட்டமிட்டுள்ளது.
சிக்னல்களில் முனிசிபல் பேருந்துகளுக்கான முன்னுரிமைத் திட்டம் சென்னையின் பொதுப் போக்குவரத்து அமைப்புக்கு பல நன்மைகளைத் தரும். இது பயண நேரத்தை குறைக்கும், அட்டவணை நம்பகத்தன்மை மற்றும் எரிபொருள் செயல்திறனை மேம்படுத்தும். சிக்னல்களில் காத்திருப்பு நேரத்தை குறைப்பதன் மூலம் எரிபொருள் பயன்பாடு, போக்குவரத்து நெரிசல் மற்றும் கார்பன் வெளியேற்றம் ஆகியவை குறைக்கப்படும்.
இது பொதுப் போக்குவரத்தை மக்கள் அதிகம் தேர்வு செய்ய ஊக்குவிக்கும் என எதிர்பார்க்கப்படுகிறது. இந்த முன்முயற்சியானது பொதுப் போக்குவரத்து மற்றும் பயணிகள் பயணத்தின் செயல்திறனை கணிசமாக மேம்படுத்தும் ஆற்றலைக் கொண்டுள்ளது. இத்திட்டம் 2025 ஜனவரி இறுதிக்குள் அறிமுகப்படுத்த திட்டமிடப்பட்டுள்ளது.இவ்வாறு அவர்கள் கூறினர்.
சென்னையில் தற்போது இயக்கப்படும் அனைத்து மாநகர பேருந்துகளும் ஜிபிஎஸ் தொழில்நுட்பத்தைப் பயன்படுத்தி வருகின்றன. இத்தொழில்நுட்பம் மூலம், பேருந்துகள் வரும் நேரம் உள்ளிட்ட தகவல்களை பயணிகள் பெறுகின்றனர். பேருந்துகளில் ஜிபிஎஸ் கருவிகள் பொருத்தும் பணியும், முக்கிய சிக்னல்களில் சிசிடிவி கேமராக்கள் பொருத்தும் பணியும் நிறைவடைந்துள்ளது. இந்த இயந்திர மாற்றங்கள் தற்போது மாநகரப் பேருந்துகளில் முன்னுரிமை அளிக்கப்பட்டு வருகின்றன.
