கோவை: மக்கள் சேவை மையம் சார்பில் மகளிர் சுயஉதவிக் குழுக்களுக்கான பயிற்சி முகாம் கோவை ராம்நகரில் உள்ள விஜய் பார்க் இன் ஓட்டல் வளாகத்தில் நேற்று நடைபெற்றது. மக்கள் சேவை மைய நிறுவனரும், பா.ஜ., தேசிய மகளிர் அணி தலைவரும், கோவை தெற்கு தொகுதி பா.ஜ., எம்.எல்.ஏ.,வுமான வானதி சீனிவாசன் தலைமை தாங்கி துவக்கி வைத்தார். மேலும் செய்தியாளர்களிடம் அவர் கூறியதாவது:-
மக்கள் சேவை மையம் மூலம் நடத்தப்படும் சுயஉதவிக்குழுக்கள் மூலம் ஏராளமான பெண்கள் கோடீஸ்வரர்களாக மாறி வருகின்றனர். பெண்கள், குறிப்பாக கிராமப்புற பெண்கள், ட்ரோன்கள் போன்ற அதிநவீன தொழில்நுட்பங்களை இயக்க வேண்டும். இதை அரசு ஊக்குவிக்க வேண்டும். மத்திய அரசு ஏற்கனவே இதுபோன்ற திட்டத்தை ஊக்குவித்து வருகிறது.
பயிற்சி முகாம் மூலம் ஆயிரக்கணக்கான பெண்களின் கனவுகளை நிறைவேற்ற உதவுகிறோம். புயல் பாதிப்புக்கு நிவாரணம் வழங்கவில்லை, டங்ஸ்டன் சுரங்கத்திற்கு வழக்கம் போல் பாஜக ஆதரவு என பொய்யான குற்றச்சாட்டுகளை கூறி மக்களை திமுகவினர் ஏமாற்றி வருகின்றனர். கல்வித்துறையில் புதிய திட்டத்தை அமல்படுத்தும் முன் மத்திய அரசு மாநில அரசுகளிடம் கருத்து கேட்பது வழக்கம். தமிழக அரசு முதலில் ஒப்புதல் அளித்து, பிறகு செயல்படுத்தும் நிலைக்கு வரும்போது, சுயலாபத்திற்காக ஏதேனும் காரணங்களைக் கூறி எதிர்ப்பது ஏற்புடையதல்ல.
மத்திய அரசின் காப்பீட்டுத் திட்டத்தை ஊக்குவிக்கக் கூடாது, விஸ்வகர்மா திட்டத்தை எதிர்ப்பது உள்ளிட்ட நடவடிக்கைகளை தமிழக அரசு மேற்கொண்டு வருகிறது. தமிழில் கற்பிக்கலாம் என நீதிமன்றம் அறிவுறுத்திய பிறகும், தமிழகத்தில் நவோதயா பள்ளிகள் தொடங்க அரசு அனுமதி மறுத்து வருகிறது. தமிழகத்தின் வருங்கால சந்ததியினருக்கு திமுக அரசு துரோகம் செய்து வருகிறது.
சட்டம் ஒழுங்கு மோசமாகச் சீர்குலைந்துள்ளது. குற்றவாளிகள் காவல்துறைக்கு பயப்படாவிட்டால், குற்றச் சம்பவங்களை எப்படித் தடுக்க முடியும். தவறுகளை மறைக்க மத்திய அரசுக்கு எதிராக திமுக செயற்குழு பொய்யான தீர்மானங்களை நிறைவேற்றியுள்ளது. மக்கள் நம்ப மாட்டார்கள். சட்டசபை தேர்தலில் 200 இடங்களுக்கு பதிலாக 20 இடங்களில் மட்டுமே வெற்றி பெறுவார்கள்.
