30 வயதைக் கடந்தவுடன் வளர்சிதை மாற்றம் மெதுவாகிறது. காயங்களிலிருந்து மீள்வதற்கு அதிக நேரம் எடுக்கும், மன அழுத்தமும் வழக்கத்தை விட அதிகமாகும். இது வயதானதற்கான அறிகுறியல்ல, உங்கள் உடல் மேலும் நுட்பமான கவனிப்பைத் தேடத் தொடங்குகிறது என்பதைக் காட்டுகிறது. நாம் தினசரி உணவில் இருந்து அனைத்து தேவையான ஊட்டச்சத்துகளையும் பெற முடியாது. அதனால், சப்ளிமெண்ட்கள் கூடுதலாக உதவக்கூடியவை. அவை மாயாஜால தீர்வாக இருக்காவிட்டாலும், நீண்டகால ஆரோக்கியத்துக்கு ஆதரவாகவும், ஆற்றல் அதிகரிக்கவும் மற்றும் எதிர்காலத்தில் ஏற்படும் நோய் அபாயங்களைத் தடுக்கும் வகையிலும் செயல்படலாம். இந்த நிலையில் கவனிக்க வேண்டிய முக்கியமான சப்ளிமெண்ட்கள் சில இங்கே விளக்கப்பட்டுள்ளன.
மல்டிவைட்டமின்கள் பெரும்பாலானோரால் விரும்பப்படும் சப்ளிமெண்ட் ஆகும். ஆனால் சமச்சீரான உணவுக்கட்டமைப்பை பின்பற்றுபவர்களுக்கு அவை அவசியம் அல்ல. 30 வயதுகளில் பரபரப்பான வேலை, ஒழுங்கற்ற உணவுமுறை போன்ற சூழ்நிலைகளால் பி வைட்டமின்கள், துத்தநாகம், இரும்பு மற்றும் ஃபோலேட் போன்றவைகளில் ஏற்படும் குறைபாடுகளை, உயர்தர மல்டிவைட்டமின்கள் நிரப்ப உதவலாம்.
கால்சியம் பற்றிய முக்கியத்துவமும் இவ்வயதில் அதிகம். குறிப்பாக பெண்கள், 30க்குப் பிறகு எலும்பு அடர்த்தியை இழக்க தொடங்குவர். ஆனால் கால்சியம் மட்டும் போதாது. அதன் சிறந்த உறிஞ்சுதலுக்காக, வைட்டமின் D3 மற்றும் K2 சேர்க்கப்பட வேண்டும். அதிகப்படியான கால்சியம் தமனிகளில் படிந்து பாதிப்பு ஏற்படுத்தும் வாய்ப்பு இருப்பதால் உணவில் இருந்து பெறுவது பாதுகாப்பானது. பால், விதைகள், கீரைகள் போன்றவற்றில் இயற்கையான கால்சியம் கிடைக்கிறது.
வைட்டமின் C நோய் எதிர்ப்பு சக்திக்குப் பேருடையது. இது சளியை முற்றிலும் தடுக்காது என்றாலும், அதனுடைய தீவிரத்தையும் காலத்தையும் குறைக்கும். மேலும் இது சரும ஆரோக்கியம், கொலாஜன் உருவாக்கம் மற்றும் இரும்பு உறிஞ்சுதலுக்கும் உதவுகிறது. குறிப்பாக மன அழுத்தம், தூக்க குறைபாடு மற்றும் மாசுபாடு உள்ள சூழலில் இது முக்கிய பங்கு வகிக்கிறது.
இரும்புச்சத்து ஆற்றல், ஆக்ஸிஜன் போக்குவரத்து மற்றும் அறிவாற்றல் செயல்பாட்டுக்குத் தேவையானது. இருப்பினும், அதிகப்படியான இரும்புச்சத்து உடலில் ஆக்ஸிடேட்டிவ் ஸ்ட்ரெஸை ஏற்படுத்தும். சரியான அளவுகள் தெரிந்த பிறகே இதை சப்ளிமெண்டாக எடுத்துக்கொள்ள வேண்டும். அடிக்கடி சோர்வாக இருப்பவர்களும், தலைவலி அல்லது பல்லீர்ப்பு நிறம் காணப்படும் பெண்களும் ரத்தத்தில் இரும்புச்சத்து அளவை பரிசோதித்து அதை சரிசெய்யலாம்.
புரத சத்தும் இவ்வயதில் மிக முக்கியம். 30க்கு பிறகு தசை அடர்த்தி குறைவதற்கும் வளர்சிதை மாற்றம் மெதுவாகுவதற்கும் காரணம் புரதப் பற்றாக்குறை இருக்கலாம். உணவிலிருந்து பெறுவது சிறந்தது என்றாலும், சிலருக்கு புரத பவுடர்கள் மிகவும் உதவியாக இருக்கும். குறிப்பாக உணவை தவிர்ப்பவர்கள், பசியில்லாதவர்கள் மற்றும் தசை சிதைவில் இருந்து மீள விரும்புவோர் இதனை பயன்படுத்தலாம்.
பயோட்டின் அல்லது வைட்டமின் B7, கெரட்டின் வளர்ச்சிக்கு உதவுகிறது. இது முடி மற்றும் நகங்கள் ஆரோக்கியமாக இருக்க உதவினாலும், அதன் தேவையற்ற உட்கோள்கள் சில சிக்கல்களை உருவாக்கலாம். பயோட்டின் குறைபாடுகள், மன அழுத்தம் மற்றும் கர்ப்பத்திற்குப் பிறகு ஏற்படும் முடி உதிர்தலைக் கட்டுப்படுத்த சில நேரங்களில் பயனளிக்கலாம், குறிப்பாக துத்தநாகம், இரும்பு மற்றும் சிலிக்கா போன்றவற்றுடன் சேர்த்தால்.
இந்த அனைத்து சப்ளிமெண்ட்களும் தனிநபர் உடல்நிலை மற்றும் வாழ்க்கை முறைப்படி மாறுபடக்கூடியவை. எனவே, எதையும் தொடங்கும் முன் மருத்துவரின் ஆலோசனையை பெறுவது அவசியம்.
